Isang lalaki na nagnakaw sa isang fried chicken restaurant sa Bronx, New York City noong Hulyo ang inaresto noong nakaraang Huwebes matapos balikan ang ninanakawan na restaurant at makilala siya ng mga empleyado.

Hindi inakala ni Christopher Schlosser, 21, na matatandaan ng mga empleyado ang kanyang mukha nang pumasok sa Texas Chicken and Burger sa Brook Avenue noong Disyembre 8.

Agad na tumawag sa 911 ang mga empleyado at sa pagdating ng mga pulis ay inaresto ang lalaking adik sa fried chicken.

Kinasuhan siya ng robbery dahil sa insidente noong Hulyo 27 kung saan pinasok niya ang counter at nilimas ang mga tray na naglalaman ng fried chicken at biskwit habang tulalang nanonood lamang ang mga empleyado at customer.

Pagkatapos punuin ng pagkain ang bag, tinabig niya ang isang empleyado at tumalilis palabas ng restaurant.

Isang araw bago maaresto si Schlosser, isang lalaki at babae ang nagnakaw din umano ng fried chicken sa nasabing tindahan.

Ang mga suspek na pinaniniwalaang mga tinedyer, ay nagnakaw din umano ng $15 halaga ng fried chicken na pinagkasya nila sa isang maliit na kahon.

Nagtalo pa umano ang dalawa sa harap ng counter dahil kulang umano ang kanilang pera, saka tumalon ang babae at pinuno ng fried chicken ang maliit na kahon.

Anak ni Napoles absuwelto sa tax evasion